ပဲ့ကြွေကဗျာရှည် ( အပိုင်း ၁ -၇ )

 ပဲ့ကြွေကဗျာရှည်

(၁)

ငယ်စဉ်က ဆရာမ

အက်ဆေးတစ်ပုဒ် အိမ်စာပြပါတဲ့ 

ခေါင်းစဉ်က အရိုးရှင်းဆုံးပါ

ကျွန်တော့်အကြောင်းပါတဲ့ 

အခုနေများရေးဆိုရင်

သိပ်များလို့ မနိုင်နိုင်လောက်ဘူး 

အဆင်မပြေခြင်းတွေကနေ လွတ်ချင်တဲ့ ဆုတောင်းက

ထမင်းဆီဆမ်း ရွှေလင်ဗန်းပေးပါ လမင်းကြီး ပြောသလိုဖြစ်နေပြီ 

အမေက စိတ်ညစ် အဖေက စိတ်ပျက်

ငါဆိုတာ ကျောက်ခဲကို့ နို့ညှစ်ရသလို

ဘာဆိုဘာမှ မထက်မြတ် 

အသက်နဲ့လူမလုပ် အရှက်နဲ့လူလုပ်တဲ့လောကဆိုတော့လည်း

ဒီသုံးမရတဲ့သားအတွက် ရှက်ကြဦးပေါ့ အမေတို့ရာ